د ساختماني او استوګنیزو نقشو د وېزې تخنیکي کمېسیون لومړنۍ غونډه ترسره شوه
۱۴۴۶/۱۲/۲۱
د ساختماني او استوګنیزو نقشو د وېزې تخنیکي کمېسیون خپله لومړنۍ غونډه د کور جوړولووزارت د مسکن، ودانیزو چارو او د برنامو د پراختیا د محترم مرستیال الحاج محمد اسماعیل فائزپه مشرۍ د یاد کمېسیون د غړو رییسانو او آمرینو په شتون کې ترسره شوه.
په پیل کې، محترم معین د خپلو خبرو پر مهال د کمېسیون د غړو تر منځ د لا ډېرې همغږۍ او د چارو د چټکتیا پر اړتیا ټینګار وکړ او زیاته یې کړه چې له دې وروسته باید د نقشو د ارزونې، کتنې او تائید پروسه له ځنډ سره مخ نه شي.
نوموړي څرګنده کړه، چې یاد کمېسیون به له دې وروسته په منظم ډول دوامداره غونډې ولري او هغه پروژې چې له داخل یا بهر څخه کمېسیون ته راجع کېږي، باید ژر تر ژره وڅېړل شي او پرې تصمیم ونیول شي.
د غونډې ګډونوالو هم د کار د بهیر د چټکتیا، د نقشو د تائید او تصدیق اړوند خپل نظریات او وړاندیزونه شریک کړل، هغوی ټینګار وکړ چې د نقشو د ارزونې بهیر باید د ټاکل شوي چک لېست له مخې ترسره شي، ترڅو له هر ډول ځنډ او خنډ څخه مخنیوی وشي.
یادولو ده چې له دې وروسته به د امارتي او شخصي ساختماني او استوګنیزو نقشو د ارزونې، کتنې او تائید چارې د همدې تخنیکي کمېسیون له خوا ترسره کېږي.
دغه کمېسیون د کور جوړولووزارت د مسکن، ودانیزو چارو او د برنامو د پراختیا معینیت په غوښتنه او دکور او ښار جوړولو وزارت د محترم مقام د منظورۍ پر بنسټ نوې جوړ شوی دی.
