د تخنیکي ټیمونو له لوري د غزني د بېلابېلو ښاري پروژو څارنه او ارزونه وشوه
۱۴۴۶/۱۱/۲۱
غزني ولایت کې د کور او ښار جوړولو ریاست محترم رئیس مولوي نور ولي بلال متقي وایې، د ریاست اړوند تخنیکي ټیمونو یې د یونپس مؤسسې په مالي ملاتړ د تطبیق لاندې بېلابېلو ښاري پروژو څخه د څارنې او ارزونې په موخه لیدنه وکړه.
ښاغلی مولوي متقي وایې، یادې لیدنې د پروژو د تطبیق کیفیت لوړولو، د ودانیزو موادو معیار ته پاملرنه او د چارو د روڼ تطبیق په موخه ترسره شوي دي.
نوموړی وایې، د "خشک" پروژې د سړک کانکرېټ اچولو چارې وڅارل شوې، چې په کې د کانکرېټ د کیفیت معلومولو لپاره د سلنډر ټسټ نمونې واخیستل شوې؛ د ډبرو د اندازې او کیفیت معاینه وشوه؛ او د کانکرېټ رطوبت د ساتنې لپاره تاري بوجۍ وکارول شوې.
له دې سره هممهاله، د "شېرآباد" د سړک څنګ ویالې کانکرېټ اچولو ته بشپړ تیاری نیول شوی و.
د نو اباد ښارګوټي د پښتون مېنې د کوڅو د کانکرېټ اچولو پروژه او د نو اباد کانال جوړولو چارې چې د (یونپس) له لوري تمویل او د خصوصي شرکتونو له خوا تطبیقېږي، له نږدې تر څارنې لاندې ونیول شوې.
دغه راز، د غزني ښار اړوند د پوهنې محترم ریاست لوېدیځ لوري او د اتل مارکېټ شمالي لوري ته د پلي لارو انترلاک موزاییک کارونه هم وکتل شول، او تطبیقوونکو شرکتونو ته لازمې لارښوونې ورشوې.
د غزني ولایت د کور او ښار جوړولو ریاست ډاډ ورکوي چې ښاري پراختیايي پروژې به له نږدې څارل کېږي او د خلکو لپاره به معیاري، شفاف او باکیفیته خدمات وړاندې شي.
