د کور او ښار جوړولو وزارت مالي او اداري مرستیال د نظارت لوی ریاست له استازو سره وکتل
۱۴۴۶/۰۸/۰۹
د کور او ښار جوړولو وزارت محترم مالي او اداري مرستیال الحاج محمد ارسلاح خروټي په خپل کاري دفتر کې د نظارت لوی ریاست د ترسره شوو چارو د پلټنو عمومي رئیس محترم مولوي نورحیدر صدر او مل پلاوي سره وکتل.
په دغه کتنه کې، د کور او ښار جوړولو وزارت اړوندو ریاستونو او پروژو په تړاو د نظارت لوی ریاست له لوري د موندنو پر مسودې خبرې وشوې.
محترم مولوي نورحیدر صدر وویل، ملګرو یې د (1402) کال په موده کې د کور او ښار جوړولو وزارت د ریاستونو او پروژو په اړه پلټنې کړي او خپلې موندنې یې د مسودې په بڼه له وزارت سره شریکې کړي دي.
نوموړي وویل، لازمه ده چې، اړوند ریاستونه یاده مسوده مطالعه کړي او خپل نظر په کې ولیکي چې، وروسته به بیا تر بلې وروستۍ ناستې وروسته د بشپړ راپور په توګه د نظارت محترم لوی ریاست سره شریک شي.
د کور او ښار جوړولو وزارت محترم مالي او اداري مرستیال الحاج محمد ارسلاح خروټي د دغه وزارت د دفتر ریاست ته دنده وسپارله چې، یاده مسوده تر اړوندو ریاستونو ورسوي، هغوی دې یې مطالعه کړي او د خپل نظر تر څرګندولو وروسته دې یې ژر شریک کړي.
د کور او ښار جوړولو وزارت په ټولو برخو کې شفافیت ته ژمن دی او د ټولو هغه کړکیو د بندولو هڅې کوي چې، د نیمګړتیا د رامنځته کېدو امکان ترې لیدل کېږي.
