له ښار جوړولو او ځمکو وزارت څخه د اراضۍ ریاست جدا کولو په موخه لومړنۍ ناسته وشوه
۱۴۴۳/۱۰/۱۹
د امیر المؤمنین شیخ الحدیث مولوي هبة الله اخندزاده حفظه الله د فرمان پر اساس د ښار جوړولو او ځمکو وزارت له تشکیل څخه د ځمکو ریاست جدا او د کرنې او مالدارۍ محترم وزارت پورې اړوند کېږي.
په همدې تړاو د ښار جوړولو او ځمکو وزارت محترم مالي او اداري مرستیال حافظ محمد امین فاروقي په مشرۍ تخنیکي ناسته وشوه، چې ټول اړوند د تخنیکي ریاستونو مسؤلینو هم په کې ګډون کړی وو.
په دغه ناسته کې بحث وشو چې څنګه کېدای شي د ځمکو برخه د ښار جوړولو او ځمکو وزارت څخه جدا او د کرنې او مالدارۍ محترم وزارت پورې اړوند شي چې هېڅ لوری زیانمن نه شي.
ښاغلي مالي او اداري مرستیال په ناسته کې د اړوندو ریسانو د نظریاتو اورېدو وروسته ټینګار وکړ چې د امیر المؤمنین حکم یو لازمي او مهم امر دی چې باید هر څه ژر تطبیق شي.
ښاغلي حافظ محمد امین فاروقي وویل، د امیر المؤمنین حفظه الله حکم د دولتي کار کوونکو د بې برخلیکتوب په موخه نه؛ بلکې د چارو د لا ښه پرمختګ او خلکو ته د زیات شغل او کار زمینې برابرولو په موخه صادر شوی ده.
نوموړي د ښار جوړولو او ځمکو وزارت د بشري سرچینو، مالي او اداري ریاستونو ته سپارښتنه وکړه چې پر دغه موضوع هر اړخیزه غور وکړي او له قانون سره سم خپل فني او مسلکي نظریات وړاندې کړي چې له کوم زیان پرته د ځمکو ریاست بشري ځواک، منقول او غیر منقول اجناس، بودیجه او نورې چارې په مرکز او ولایتونو کې وڅېړي او راپور رسماً مالي او اداري معینیت ته وسپاري چې بیا به د وزارت د رهبرۍ لخوا یاد راپور د ادغام له محترمې کمېټې سر شریک کېږي او له مخې به یې پرېکړه کېږي.
