هرات کې دوه ټولګټې پروژې ګټې اخیستنې ته وسپارل شوې

ښارجوړولو او ځمکو وزارت د هرات ولایت د ګذرې ولسوالۍ په صنعتي پارکونو کې د دوه ژورو څاګونو د کېندنې چارې او همداراز د دې ولایت په کشک کهنه ولسوالۍ کې د ۳۴۰ کسانو په ظرفیت د یو جومات رغنیزې چارې بشپړې او ګټې اخیستنې ته یې وسپارل.

په صنعتي پارکونو کې دوه ژورې څاه ګانې د ۱۱ میلیونه او ۷۰۰ زره افغانیو په ارزښت د ښارجوړولو او ځمکو وزارت له پراختیايي بودیجې او د ۳۴۰ کسانو په ظرفیت د جومات ودانۍ په ۳۷۰ متر مربع ځمکه کې په یو پوړ د ۱۲ میلیونه افغانیو په ارزښت د حج او اوقافو وزارت له پراختیايي بودیجې جوړ شوی دی.

ښارجوړولو او ځمکو وزارت د هېواد په کچه د روغتیايي مرکزونو، د دولتي ادارو ودانیو، لوبغالو، کتابتونونو، موزیمونو، وړکتونونو، جوماتونو او تعلیمي او تحصیلي مرکزونو په جوړولو کې رغنده رول لوبولی او د ټولګټو پروژو تطبیق د دې وزارت له مهمو پروګرامونو څخه شمېرل کېږي.

###