یو بل ته د همکارۍ لاس ورکړئ او خپل خلک او هېواد د پردیو له احتیاج وژغورئ
۱۴۴۷/۷/۲۴
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د دغه وزارت د یو شمېر ریاستونو له کارکوونکو سره وکتل او پر اړینو موضوعاتو یې خبرې وکړې.
ښاغلي وزیر الحاج مولوي نجیب الله حیات حقاني وویل، په خپلو هېوادوالو رحم وکړئ او په ځانګړې توګه هغو باندې چې په ګاونډیو هېوادونو کې په بد وضعیت ژوند کوي او یا راستنېږي.
نوموړي وویل، هر رسمي مامور ته چې کوم کار سپارل کېږي، باید په سمه توګه او په خپل وخت یې سرته ورسوي او د چارو له ځنډولو دې ډډه وکړي.
هغه د خپلو خبرو په دوام زیاته کړه، څوک چې پر ملت رحم ونه کړي، هغه خپله د رحم مستحق نه ګرځي او بیا به د خپلو کړنو جواب ورکوي.
ښاغلي مولوي حقاني زیاته کړه، امارت کې ټول کارکوونکي د ولس خدمتګاران دي، چې باید په بشپړې ریښتینولۍ ورته کار وکړي او ترلاسه کوونکی معاش ځان ته حلال کړي.
دغه راز، یادونه یې وکړه چې په امارتي ادارو کې کار کوونکي دې هېڅکله داسې فکر نه کوي چې ماتحت خلک او ولس د دوی نوکران دي.
مولوي نجیب الله حیات حقاني وویل، د هېواد او د ولس په پښو درېدو، په ځان بسیا کېدو او پیاوړتیا لپاره لازمه ده چې ټول یو بل ته د همکارۍ لاس ورکړي او خپل خلک او هېواد د پردیو له احتیاج وژغوري.
اطاعت، د چارو نه ځنډ، ژمنتیا، دقت او چټکتیا هغه نور موارد وو، چې د محترم وزیر له لوري پرې ټینګار وشو.
