کندهار کې د خپل سرو مارکېټونو او کمپلیکسونو مخنیوی وشو
۱۴۴۵/۰۷/۳۰
کندهار کې د کور او ښار جوړولو رئیس محترم مولوي عبدالمتین عاشق وایي، د ریاست اړوند د ښاري او ساختماني تخلفاتو د مخنیوی ټیم یې د دغه ولایت په سپين بولدک ولسوالۍ کې د شاوخوا لس خپل سرو او غیر قانوني مارکېټونو او کمپلیکسونو له جوړولو مخنیوی وکړ.
د یاد ریاست په خبره، دغه خپل سري مارکېټونه د عامو خلکو له لوري ځینې یې په دولتي ځمکو، ځینې یې په شنو ساحو، د سړک په حریم او ځینې یې له قانوني اسنادو او جواز پرته د جوړېدو په حال کې وو، چې د کور او ښار جوړولو ریاست یې مخنیوی وکړ.
د دغه مارکېټونو او کمپلیکسونو چې هېڅ نوع قانوني اسناد یې نه درلودل، جوړونکو ته یې خبر ورکړل شو چې له دا ډول خپل سریو لاس واخلي.
کندهار کې د کور او ښار جوړولو ریاست په دې اړه د کندهار امنیې قوماندانۍ، د کندهار ښاروالۍ او د ولایت محترم مقام ته هم خبر ورکړی او د یادې چارې او د ورته اقداماتو د مخنیوي برخه کې یې د همکارۍ غوښتنه وکړه.
د کور او ښار جوړولو وزارت له ټولو هېوادوالو غوښتنه کوي چې له خپل سرو رغنیزو چارو ډډه وکړي، او ټولې رغنیزې چارې دې له قانوني لارو چارو مخکې یوسي.
