کابل ښار کې د ترافیکې ګڼې ګوڼې کمولو او د تم ځایونو رامنځته کولو په اړه ناسته وشوه
۴۴۶/۰۹/۰۶
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ او د کابل ښاروالۍ محترم ریاست، د ترافیکو محترم عمومي ریاست، صنعت او سوداګرۍ محترم وزارت، مالیې محترم وزارت، ترانسپورت محترم وزارت او د احکامو او فرامینو د تعقیب او څار محترم عمومي ریاست په غړیتوب ناسته وشوه.
دغه ناسته د ریاسة الوزرا محترم عالي مقام د حکم پر اساس وشوه چې، څنګه کېدای شي په کابل ښار کې ترافیکي ګڼه ګوڼه کمه شي، د موټرو لپاره منظم تم ځایونه جوړ شي او خلکو ته اسانتیاوې برابرې شي.
د شیخ حمدالله نعماني په مشرۍ جوړه شوې کمېټه به په شته ودانيو کې د موټر تم ځایونو جوړولو په موخه حقوقي، تخنیکي او اقتصادي ارزونه کوي او بشپړ راپور به د ریاسة الوزرا له محترم عالي مقام سره شریک کوي.
په ناسته کې د کمېټې مشرتابه د کمېټې راغلو غړو ته د ریاسة الوزرا محترم عالي مقام حکم بیان کړ، له کابل ښاروالۍ یې د موضوع د انګیزې د وضاحت غوښتنه وشوه.
له بېلا بېلو دلایلو او نظرونو وروسته د کابل محترمې ښاروالۍ ته دنده وسپارل شوه چې، د کابل ښار په ټولو (۲۲) ناحیو کې د شته ودانیو چې، قانوني د موټرو تم ځایونه (پارکینګ) نه لري او یا هغه چې د مجوز له مخې یې تم ځای جوړ، خو نوره ګټه ترې پورته کوي، معلوم او ارقام دې یې راتلونکې ناسته کې وړاندې کړي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، په راتلونکې ناسته کې د ارقامو تر معلومېدا وروسته به هر اړخیز کاري راپور چمتو او د ریاسة الوزرا محترم عالي مقام سره شریک کړي.
د کور او ښار جوړولو وزارت هڅې پیل کړي چې، په کابل ښار او نورو کې منظمې د تګ راتګ لارې جوړې، لاربندي ختمه او هېوادوالو ته ګڼې اسانتیاوې برابرې شي.
