ښار جوړولو او ځمکو وزارت سرپرست وزیر د پیروزي له ښارګوټي لیدنه وکړه
ښار جوړولو او ځمکو وزارت سرپرست وزیر محترم محمود کرزی د دې وزارت له یو شمېر چارواکو سره یو ځای نن له غرمې مخکې پیروزي ښارګوټي ته لاړ او د دې ښارګوټي لپاره د اوبو د زېرمو د برابرولو په اړه له زیني ځایونو څخه لیدنه ترسره کړه.
د دې لیدنې پر مهال، یو شمېر انجنیرانو خپل تخنیکي نظریات د اوبو د زېرمو د تنظیم او برابرولو په اړه ښار جوړولو او ځمکو وزارت سرپرست وزیر ته وړاندې کړل او محترم محمود کرزی د تخنیکي نظریاتو د اورېدو وروسته د یاد ښارګوټي لپاره د اوبو د زېرمو د جوړولو په تړاو اړونده مسوولینو ته لازمې لارښوونې وکړې.
پیروزي ښارګوټی د ښار جوړولو او ځمکو وزارت یو له مهمو پراختیايي پروژو څخه دی چې دا ښارګوټي د کابل ولایت په ده سبز ولسوالی کې جوړیږي.
دا ښارګوټی په ۸۵۰۰ جریبه ځمکه کې د ۹۳۰۰ استوګنیزو نمرو او ۴۴۷ بلاکونو په درلودو د ښار جوړولو او ځمکو وزارت له خوا جوړیږي.
پیروزي ښارګوټی د کابل ولایت په کچه یو له معیاري ښارګوټو څخه دی چې په جوړیدو سره به یي د ګڼ شمېر هیوادوالو د کور نشتون ستونزه حل شي.
###
