ښار جوړولو او ځمکو وزارت سرپرست وزیر د شهیدانو او معلولینو په چارو کې د دولت وزارت له وزیر سره وکتل
ښار جوړولو او ځمکو وزارت سرپرست وزیر محترم محمود کرزی د شهیدانو او معلولینو په چارو کې د دولت وزارت له وزیر محترم لعل الدین اریوبي سره وکتل او د معلولینو او شهیدانو کورنیو ته د ښارګوټو پر جوړونې او استوګنیزو نمرو پر وېش خبرې وکړې.
په سر کې، محترم لعل الدین اریوبي، معلولینو او د شهیدانو کورنیو لپاره د استوګنې د زمینې برابرولو په برخه کې د ښار جوړولو او ځمکو وزارت له هر اړخیزې همکارۍ مننه وکړه او په ځانګړې توګه معلولینو او د شهیدانو کورنیو ته د استوګنیزو نمرو د وېش او د معلولینو لپاره د اسایشګاه د جوړونې په تړاو خپل وړاندیزونه مطرح او د ښار جوړولو او ځمکو وزارت له مشرتابه د دغو پروژو د تطبیق غوښتنه وکړه.
ورپسې، ښار جوړولو او ځمکو وزارت سرپرست وزیر محترم محمود کرزی، د شهیدانو او معلولینو په چارو کې د دولت وزارت یې د حکومت یو له مهمو وزارتونو څخه یاد کړ او د شته ستونزو حل په پار پر ګډ کار ټینګار وکړ.
ښار جوړولو او ځمکو وزارت سرپرست وزیر ښاري چارو معینیت ته لارښوونه وکړه ترڅو په شته ښارګوټو کې سړک کشۍ او د استوګنیزو نمرو خط اندازي دې ژر تر ژر ترسره او مستحقو کسانو لپاره د نمرو وېش ته زمینه برابره کړي.
همدارنګه، ساختماني چارو معینیت ته لارښوونه وشوه چې د شهیدانو او معلولینو په چارو کې د دولت وزارت سره په ګډه د اسایشګاه ودانۍ برآورد ترسره او د یادې ودانۍ ډیزاین ترتیب او دې وزارت ته دې وسپاري.
په پای کې، محترم محمود کرزی د شهیدانو او معلولینو په چارو کې د دولت وزارت مشرتابه ته د یادو پروژو د تطبیق په اړه ډاډ ورکړ.
###
