ښاري تخلفات او غیر پلاني ابادي، ستونزې پیدا کوي، چې د کور او ښار جوړولو وزارت یې مخنیوی کوي
۱۴۴۸/۲/۷
د کور او ښار جوړولو وزارت، د کیفیت د کنټرول او ښاري سرغړونو ته د رسېدنې محترم لوی ریاست اړوند، د ښاري سرغړونود مخنیوي محترم ریاست تخنیکي ټیمونو، د خپلو مخکنیو څارنو د دوام په لړ کې، دا ځل د کابل ښار د څلورمې ناحیې له بېلابېلو سیمو څخه څارنه وکړه.
د دغې څارنې پر مهال، د درېیم پروان سیمې اړوند فرعي سړکونه او د شهرآرا بلاکونه وارزول شول.
همدارنګه، هغه (۱۷۰) هټۍ چې په شنه ساحه کې په ناقانونه ډول جوړې شوې وې او مخکې مُهر او لاک شوې وې، له نږدې وکتل شوې.
د څارنې په ترڅ کې، هغه رغنیزې پروژې هم وڅېړل شوې چې د نافذه قوانینو، منظور شویو ښاري پلانونو او یا د ګاونډیانو د حقونو د نقض احتمال په کې موجود و، چې د غیرقانوني کړکیو جوړول یې د پېلګې په توګه ویلی شو.
سربېره پر دې، د هغو ودانیو له مالکانو څخه چې د خپلو پروژو قانوني اسناد، جوازونه او اړوند مدارک یې نه وو وړاندې کړي، وغوښتل شول چې یاد اسناد د ښاري تخلفاتو د مخنیوي ریاست ته وسپاري، ترڅو د دقیقې ارزونې او له منظور شویو پلانونو سره د تطبیق وروسته، د هر ډول سرغړونې د تثبیت په صورت کې قانوني اجراآت ترسره شي.
د دې څارنو موخه، د ښاروالۍ له منظور شویو پلانونو سره سم د ودانیو جوړول، د غیرمعیاري او بېبرنامې ودانیو مخنیوی، د ښاري نظم ټینګښت، د ګاونډیانو د حقونو او شخصي حریم ساتنه، د ودانیز کیفیت لوړول او د ښاري مدیریت پیاوړتیا ده.
