ښارجوړولو او ځمکو وزارت سرپرست وزیر د هلمند والي سره ولېدل
د ښارجوړولو او ځمکو وزارت سرپرست وزیر محترم محمود کرزی د هلمند والي محترم تورن جنرال محمد یاسین، د دې ولایت د ښارجوړولو او ځمکو رئیس او د لښکرګاه ښاروال سره ولېدل او د دې ولایت د ښاري پراختیا او ټولګټو پروژو د تطبیق پر څرنګوالي خبرې وکړې.
په سر کې، د هلمند والي محترم تورن جنرال محمد یاسین د ښار جوړولو او ځمکو وزارت نقش یې د ښاري پراختیا، د ځمکوالی چارو تنظیم او ټولګټو پروژو تطبیق په برخه کې مهم وباله او په یاد ولایت کې د روانو ساختماني او ټولګټو پروژو په اړه معلومات وړاندې کړل.
همدارنګه د هلمند ولایت مسوولینو په ځانګړې توګه د اطلاعاتو او کلتور ریاست ودانیو او د درې پنځوس بستریزو روغتونونو د جوړولو، د شهیدانو لپاره د ځانکړې شوې ځمکې د ویش او تفصیلي پلان د جوړولو، د لښکرګاه ښار د تفصیلي پلان د ستونزو د حل، د هلمند ولایت سټراټيژيک پلان، د عامه کتابتونونو او د تاریخي ابدو د ترمیم او مرمت اړوند درې پروژو او د ښارجوړولو او ځمکو ریاست تجهیز په برخه کې د همکارۍ غوښتنه وکړه.
ور پسې د ښارجوړولو او ځمکو وزارت سرپرست وزیر محترم محمود کرزي په هلمند ولایت کې د ټولګټو پروژو پلي کېدل د دې وزارت لومړیتوب یاد کړ او څرګنده یې کړه چې په دې ولایت کې به د ساختماني پروژو چارې چټکې شي.
د ښارجوړولو او ځمکو سرپرست وزیر د هلمند ولایت د ښارجوړولو او ځمکو رئیس ته لارښوونه وکړه چې د والي سره په همغږۍ متقاضي ادارو ته د ځمکو د وېښ او پانګونې د جذب لپاره اړین اقدامات ترسره کړي.
محترم محمود کرزي همداراز اړوندو مسوولانو ته لارښوونه وکړه چې د هملند ولایت د ښارجوړولو او ځمکو ریاست لپاره د ودانۍ جوړول په پلان او بودجه کې شامل کړي او همداراز د یاد ریاست د تجهیز په برخه کې جدي پاملرنه وکړي.
همدارنګه، محترم محمود کرزي د ښاري چارو معینیت ته لارښوونه وکړه چې د هملند ښار په سټراټيژيک پلان کې د شته ستونزو او د لښکرګاه تفصیلي پلان د ارزولو په موخه دې یاد ولایت ته یو تخنیکي ټیم واستوي.
په پای کې د ښارجوړولو او ځمکو وزارت سرپرست وزیر د هلمند له والي څخه وغوښتل چې د دولتي ځمکو د وېش په برخه کې دې له پوره دقت څخه کار واخلي او همداراز د ټولګټو پروژو په عملي کولو کې دې د خلکو ګټي په پام کې ونیسي.
###
