په یوه ورځ کې نږدې دولس سوه نمرې پر راستنو شویو مهاجرینو ووېشل شوې
۱۴۴۷/۱۱/۲۳
د راستنو شویو مهاجرینو د ملاتړ او د هغوی د دایمي مېشتېدو په موخه، د کور او ښار جوړولو وزارت محترم وزیر الحاج مولوي نجیب الله حیات حقاني، د ځمکو د وېش بهیر پراخ او چټک کړ.
همدا لامل دی، چې تر دې دمه په زرګونو کورنیو ته یوه یوه پنځه بسوه یي نمره ځمکه ورکړل شوه، ترڅو په کې خوندي ژوند کولو ته دوام ورکړي.
تازه په تېره یوه ورځ کې (۱۱۸۵) یو زر، یو سل او پنځه اتیا راستنو شویو مهاجرو کورنیو ته د استوګنیزو ځمکو نمرې سپارل شوې دي.
د کور او ښار جوړولو وزارت په مشرۍ د دایمي مېشتېدنې کمېټې دغه نمرې په شپږو ولایتونو کې سلګونو راستنو شویو کورنیو ته وسپارلې.
په ننګرهار ولایت کې ۲۹۰، لغمان ولایت کې ۲۸۵، زابل ولایت کې ۱۶۰، فراه ولایت کې ۱۰۲، سرپل ولایت کې ۸۳ او کندز ولایت کې ۱۶۰ راستنو شویو مهاجرو کورنیو ته د استوګنیزو ځمکو نمرې ووېشل شوې.
د ځمکو د وېش دغه بهیر د شفافو اصولو له مخې ترسره کېږي او هڅه کېږي چې راستنو شویو کورنیو ته د دایمي مېشتېدو مناسب فرصتونه برابر شي، څو هغوی وکولای شي په امن او ارامه فضا کې خپل عادي ژوند ته دوام ورکړي.
یوازې په تېره یوه ورځ کې ۱۱۸۵ راستنو شویو مهاجرو کورنیو ته د استوګنیزو ځمکو نمرې سپارل؛ د راستنېدونکو کورنیو د ملاتړ او د هغوی د ستونزو د حل لپاره د امارت د جدي پاملرنې څرګندونه کوي. همداراز، تر دې مهاله په ټول هېواد کې د وېشل شویو استوګنیزو ځمکو شمېر ۲۰۰۹۷ نومرو ته ورسېد او دغه لړۍ به لا پراخه او چټکه شي.
