په کابل کې د پنځم مکروریان پروژې د شته ستونزو پر حل خبرې وشوې
۱۴۴۷/۳/۲۹
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې، د پنځم مکروریان پروژې د شته حقوقي، اداري او تخنیکي ستونزو د حل په موخه، د ایوګار قالب ساختماني شرکت له مشر ښاغلي تورګوت ایدوغان سره وکتل.
په دغه لیدنه کې، دواړو خواوو د پروژې په بېلا بېلو اړخونو خبرې وکړې، د خلکو شکایتونه، د ملکیت ستونزې، د اسنادو ناسم ترتیب، او د اپارتمانونو د سپارلو خنډ او ځنډ ارزونه یې وکړه.
ښاغلي وزیر الحاج مولوي نجیب الله حیات حقاني وویل، هوډ لري چې په دغه پروژه کې د خلکو ستونزې جدي تعقیب کړي او د حل لپاره یې یوې مناسبې هوکړې ته ورسېږي.
نوموړي په دغه برخه کې د اړوند شرکت له مسؤل غوښتنه وکړه، چې د ستونزو حل لپاره غاړه کېږدي، همغږي ولري او دا هڅه به کېږي چې، چارې قانوني، عادلانه او شفاف ډول حل شي.
د ایوګار قالب ساختماني شرکت مشر هم ژمنه وکړه، چې د پاتې کارونو بشپړولو، د شکایتونو اورېدو، او د خلکو رضایت ته لومړیتوب ورکوي.
دواړو لوریو هوکړه وکړه، چې د خلکو د ستونزو د حل لپاره به ګډ شپږ کسیز هیئت جوړوي او چارې به پر مخ وړي.
د کور او ښار جوړولو وزارت هڅې پیل کړي، چې په پروژې کې شته حقوقي او تخنیکي ستونزې حل کړي او هېوادوالو ته لازمې اسانتیاوې برابرې کړي.
