په کابل ښار کې د ودانیزو پروژو له چارو څارنه ترسره شوه
۱۴۴۷/۰۷/۰۹
د ښاري سرغړونو د مخنیوي او د پروژو د تطبیق د څارنې عمومي ریاست اړوند، د ښاري سرغړونو د مخنیوي ریاست تخنیکي او د عامه پوهاوي ټیمونو د کور او ښار جوړولو د محترم وزارت د مقام په لارښوونه او د دوامداره څارنو په لړ کې، د کابل ښار له روانو ودانیزو پروژو څخه څارنه ترسره کړه.
یاده څارنه د کابل ښار د لسمې ناحیې په بېلابېلو سیمو لکه شهر نو، قلعه فتحالله او وزیر اکبر خان کې ترسره شوه، د یادونې وړ ده چې د دغه ریاست د کاري پلان مطابق د څارنو لړۍ دوام لري او د ښار نورې ناحیې به هم په نږدې ورځو کې تر څارنې لاندې ونیول شي.
د څارنې پر مهال، په هغو پروژو کې چې د نافذه قوانینو، تصویب شویو ښاري پلانونو او یا د ګاونډیانو د حریم د نقض احتمالي نښې ولیدل شوې، د پروژو له ټولو مالکینو وغوښتل شول چې خپل رسمي اسناد، جوازونه او مدارک د ښاري سرغړونو د مخنیوي ریاست ته وسپاري، تر څو د دقیقې ارزونې او د پلانونو سره د تطبیق وروسته، د هر ډول تثبیت شوې سرغړونې په صورت کې قانوني اقدامات ترسره شي.
د دغو څارنو موخه د ښاري پلانونو سم تطبیق، د بې حده تراکم مخنیوی، د ښاري بې نظمۍ مخنیوی، د ګاونډیانو د حریم او حقونو ساتنه، د ساختماني کیفیت لوړول او د ښاري مدیریت پیاوړتیا ده.
