په کابل ښار کې د خوشحال خان د سیمې د ودانیو د قانوني وضعیت د څارنې لپاره د ښاري سرغړونو ریاست تخنیکي ټیم لیدنه وکړه
1447/05/19
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، د دې ریاست اړوند تخنیکي ټیم د کابل ښار د پنځمې ناحیې اړوند د خوشحالخان له سیمې څخه د ودانیو د قانوني وضعیت د څارنې او ارزونې لیدنه ترسره کړه.
ښاغلي مولوي حقاني وویل، یاده لیدنه د ښاري سرغړونو د ریاست د نظارت او رسیدګي آمریت او د عامه پوهاوي آمریت د استازو په ګډه ترسره شوه، چې موخه یې د غیرقانوني جوړونو مخنیوی او دودانیزو چارو د تخنیکي معیارونو ارزونه وه.
د نوموړي په خبره، په یاده سیمه کې په ځینو برخو کې د تفصیلي پلان تطبیق ندی شوی او یو شمېر ودانۍ په غیرپلاني ډول جوړې شوې دي. د څارنې پر مهال، د عامه پوهاوي ټیم د پروژو مالکانو ته د ښار جوړولو د اصولو، ضوابطو او د رسمي جواز د اخیستو د اړتیا په اړه لازمې لارښوونې وړاندې کړې، تر څو له راتلونکو سرغړونو مخنیوی وشي.
په پای کې، له ټولو مالکانو غوښتنه وشوه چې د خپلو پروژو اسناد او رسمي جوازونه د ښاري سرغړونو ریاست ته وړاندې کړي، څو له تصویب شویو پلانونو سره یې مطابقت وڅېړل شي. ریاست ټینګار وکړ چې د هر ډول سرغړونې په صورت کې به قانوني او اصولي اقدامات ترسره شي.
د کور او ښار جوړولو وزارت د ښاري سرغړونو د مخنیوي ریاست د هېواد په بېلابېلو ښارونو کې د دوامدارو څارنو، ارزونو او عامه پوهاوي پروګرامونو له لارې هڅه کوي چې غیرپلاني جوړونې کنټرول، د ښاري نظم ټینګښت او د معیاري ښار جوړولو فرهنګ پیاوړی کړي.
