په نوي کابل ښار کې د کابل–بګرام د نوي جوړیدونکي سړک له چارو څخه څارنه تر سره شوه
۱۴۴۷/۱۲/۱۶
د نوي کابل ښار د پراختیا عمومي ریاست د تخنیکي ټیم په ملتیا د کابل–بګرام د نوي جوړېدونکي سړک له روانو چارو څخه لیدنه او څارنه وکړه.
د یادې څارنې پر مهال د پروژې د پرمختګ، د کارونو د کیفیت او د تطبیق د بهیر ارزونه ترسره شوه.
همداراز د چارو د لا چټکتیا او د معیار د تطبیق په موخه د قراردادي شرکت مسؤلینو ته لازمې سپارښتنې وشوې، ترڅو د پروژې چارې د ټاکل شوي مهالوېش له مخې په ښه کیفیت سره پرمخ یووړل شي.
دا مهال د عزیز هوتک بازار په ساحه کې د سب ګریډ د دویمې طبقې کارونه روان دي.
همدارنګه د بابا قشقار سړک څخه تر خیرمې سیمې پورې د سب بېس موادو د متراکم کولو چارې دوام لري.
د یادونې وړ ده چې د اختر د رخصتیو له پای ته رسېدو وروسته د پروژې عملي کارونه بېرته پیل شوي او هڅې روانې دي چې د کابل–بګرام سړک د جوړولو چارې په چټکۍ او معیاري ډول بشپړې شي.
