په ننګرهار کې نږدې دوه زره کورنیو ته استوګنیزې نمرې ووېشل شوې
۱۴۴۷/۱۱/۱۶
د کور او ښار جوړولو وزارت د محترم وزیر الحاج مولوي نجیب الله حیات حقاني له لوري د ننګرهار ولایت د بهسودو ولسوالۍ اړوند خانکي ښارګوټي کې پر راستنو شوو مهاجرو د استوګنیزو نمرو د وېش لړۍ په دوام، د پرون شنبې په ورځ (۵۳۰) کورنیو ته استوګنیزې نمرې ووېشل شوې.
دغه بهیر د منظم پلان له مخې پر مخ روان دی، چې موخه یې راستنېدونکو کورنیو ته د دایمي سرپناه برابرول او د هغوی د ژوند د شرایطو ښه والی دی.
د نمرو وېش د شفافیت، عدالت او اړتیا پر بنسټ ترسره کېږي، څو مستحقې کورنۍ له یادو اسانتیاوو څخه برخمنې شي.
د خانکي ښارګوټي کې د استوګنیزو نمرو د وېش لړۍ د تېرې چهارشنبې په ورځ د (۳۳۵) کورنیو په برخمنیدو سره پیل شوه، ورپسې د پنجشنبې په ورځ (۴۹۸ ) او د جمعې په ورځ (۴۱۳) کورنیو ته استوګنیزې نمرې ووېشل شوې. د شنبې ورځې د وېش په ګډون، په ټوله کې (۱۷۶۷) کورنیو ته استوګنیزې نمرې ورکړل شوې دي، او دغه بهیر لا هم دوام لري.
