په لښکرګاه ښار کې د یوه سوداګریز مارکېټ له ودانیزو چارو څخه تخنیکي څارنه ترسره شوه
۱۴۴۸/۱/۲۲
د هلمند ولایت د کور او ښار جوړولو ریاست د ښاري سرغړونو ته د رسېدنې تخنیکي ټیم د ورځنیو څارنو په لړ کې، د لښکرګاه ښار د لومړۍ ناحیې په مربوطاتو کې د یوه سوداګریز مارکېټ له ودانیزو چارو څخه تخنیکي څارنه ترسره کړه.
د تخنیکي ارزونې پر مهال څرګنده شوه، چې یاده پروژه د تفصیلي پلان له ټاکل شوې ځمکنۍ کارونې سره مطابقت نه لري، د سوداګریز تعدیل منظور شوی سکېچ نه لري او د کور او ښار جوړولو وزارت له لوري ټاکل شوي تخنیکي معیارونه، لکه د ودانۍ د پوړونو نسبت، د ودانۍ د اشغال کچه، شنې ساحې، خدماتي اسانتیاوې او ترافیکي اړتیاوې، پکې نه دي رعایت شوي.
له همدې امله د پروژې ودانیزې چارې ودرول شوې، ساحه مهر او لاک شوه او د پروژې مالک ته لارښوونه وشوه، چې تر هغې به هېڅ ډول ساختماني فعالیت نه ترسره کوي، څو د پروژې سکېچ د کور او ښار جوړولو وزارت له لوري منظور نه شي.
همدارنګه، له نوموړي څخه د نافذه قوانینو او مقرراتو د رعایت او د غیرقانوني ودانیزو فعالیتونو د نه ترسره کولو په اړه رسمي تعهد هم واخیستل شو.
د هلمند ولایت د کور او ښار جوړولو ریاست د ښاري نظم د ټینګښت، د تفصیلي پلانونو د خوندي تطبیق او د غیرقانوني ودانیزو فعالیتونو د مخنیوي په موخه خپلو تخنیکي څارنو ته په دوامداره توګه ادامه ورکوي.
