په فراه ښار کې د ښاري تخلفاتو د مخنیوي په موخه څارنه ترسره شوه
۱۴۴۸/۱/۵
د فراه ولایت د کور او ښار جوړولو ریاست د ښاري تخلفاتو د مخنیوي تخنیکي ټیم، د فراه ښار د باغ پل سیمې او څلورمې ناحیې له بېلابېلو ساحو څخه ساحوي څارنه او ارزونه ترسره کړه.
یاده څارنه د دې لپاره ترسره شوه چې د تفصیلي پلانونو خلاف، د منظور شوې نقشې او قانوني جواز پرته د ودانیزو فعالیتونو مخه ونیول شي او د ښاري اصولو او مقرراتو د رعایت کچه و ارزول شي.
د څارنې پر مهال د ودانیزو پروژو وضعیت وکتل شو او د ودانیو مالکینو او جوړوونکو ته د تفصیلي پلانونو د تطبیق، تخنیکي معیارونو د رعایت او د اړینو قانوني اسنادو د ترلاسه کولو په اړه لازمې سپارښتنې او لارښوونې وشوې.
د فراه ولایت د کور او ښار جوړولو ریاست ټینګار کوي چې هر ډول ودانیز فعالیتونه باید د منظور شوو پلانونو، قانوني جوازونو او نافذه مقرراتو په چوکاټ کې ترسره شي، ځکه د ښاري اصولو او تفصیلي پلانونو خلاف جوړونې د ښاري تخلف په توګه ګڼل کېږي او له قانوني چلند سره به مخ شي.
دغه ډول څارنې د ښاري نظم د ټینګښت، د غیرمعیاري ودانیزو فعالیتونو د مخنیوي او د ښار د منظمې پراختیا په موخه په دوامداره توګه ترسره کېږي.
