په ترینکوټ ښار کې د ښاري سرغړونو د مخنیوي په هدف پراخ نظارت ترسره شو
۱۴۴۷/۰۳/۰۴
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، چې د دې ریاست تخنیکي ټیم د ارزګان ولایت د کور او ښار جوړولو ریاست د تخلفاتي ټیم په همغږۍ د ترینکوټ ښار له ټولو ناحیو څخه پراخ نظارت ترسره کړ.
همدراز د ارزګان ولایت د کور او ښار جوړولو ریاست د محترم رئیس، حاجي ملا روحالله (ابواحمد) وویل، د څلورمې ناحیې په یوه استګنیزه نمره کې یو کس هڅه کړې وه چې سوداګریز ځای جوړ کړي، خو د ښاري سرغړونو د عمومي مدیریت لخوا ورته پوهاوی ورکړل شو چې یاده ساحه یوازې د استوګنې لپاره ځانګړې شوې ده.
ښاغلي مولوي حقاني زیاته کړه، د نظارت پر مهال د تخلفاتي ټیم لخوا خلکو ته د ښار د پلانونو او اصولو په اړه عامه پوهاوی هم ورکړل شو او د یادې پروسې موخه د ښاري سرغړونو مخنیوی، د ښارونو د منظم او معیاري پرمختګ تضمین او د یو ښکلي او اباد ښار درلودل بلل کېږي.
د یادولو ده، د کور او ښار جوړولو وزارت د ښاري سرغړونو د مخنیوي ریاست په دوامدارو څارنو او عامه پوهاوي پروګرامونو سره هڅه کوي چې د ښارونو د غیرقانوني ودانیو مخه ونیسي، د ښار د ماسټرپلان تطبیق یقیني کړي او خلکو ته د ښاري ژوند معیاري فضا برابره کړي.
