په بلخ او کندهار ولایتونو کې د درملو او روغتیایي محصولاتو د کیفیت لابراتوارونو د جوړولو تړونونه لاسلیک شول
۱۴۴۷/۰۱/۲۸
د کور او ښار جوړولو وزارت محترم سرپرست وزیر الحاج مولوي نجیبالله حیات حقاني، نن د دوو مهمو پرمختیايي پروژو تړونونه لاسلیک کړل.
د دغه تړونونو موخه د درملو او روغتیایي محصولاتو د کیفیت ارزونې لپاره پرمختللي لابراتوارونه جوړولو په پار د ودانیو جوړول دي.
دغه لابراتوارونه به په بلخ او کندهار ولایتونو کې جوړ شي، چې د عامې روغتیا وزارت اړوند د محصولاتو کیفیت کنټرول، ازموینې، څېړنې او ارزونې چارې به پیاوړې کړي او د هېواد د روغتیایي خدماتو کیفیت ته به د پام وړ پرمختګ ورکړي.
تړونونه د "کوهکن" شرکت سره لاسلیک شول، چې د دواړو لابراتوارونو جوړولو ټولیز لګښت یې څه باندې ۱۸۸ میلیونه افغانۍ ټاکل شوی دی.
د پروژو عملي کار له نن پیلېږي او د بشپړېدو موده یې ۵۴۰ ورځې ټاکل شوې، چې د ۱۴۰۴/۰۵/۰۸ څخه تر ۱۴۰۵/۱۱/۰۱ پورې به دوام ومومي.
د کور او ښار جوړولو وزارت محترم سرپرست وزیر الحاج مولوي نجیب الله حیات حقاني، دا تړونونه د هېواد د روغتیایي بنسټونو د پیاوړتیا په لور یو مهم او اغېزناک ګام ګڼي او په باور یې له دې لارې به د محصولاتو کیفیت لا ښه تضمین شي.
