په استوګنیزو پروژو کې د پانګونې په موخه د پښتني بانک طرحه ارزول کېږي
۱۴۴۷/۰۱/۱۹
د کور او ښار جوړولو وزارت ته د پښتني بانک له خوا د پانګونې یوه طرحه وړاندې شوې، چې غواړي په استوګنیزو پروژو کې پانګونه وکړي.
د وزارت محترم مقام دا طرحه د شرعي ارزونې لپاره د علماء کرامو د فقهي تخریج محترمې کمیټې ته راجع کړه.
د یادې کمېټې محترم مشر مولوي عبدالباري خدام وایي، یاده طرحه د شریعت له نظره د مال د ملکیت، تصرف، پانګونې او مدیریت له اصولو سره د مطابقت ارزونې ته اړتیا لري، ځکه په خبره یې، د اسلام دین له مخې، مال باید د الله تعالی د ټاکلو حدودو په رڼا کې اداره شي.
ښاغلي مولوي خدام وایي، د علماوو شورا په خپله دویمه ناسته کې ټینګار وکړ چې د پانګونې طرحه باید له شرعي لحاظه روښانه وي، د قرارداد نوع لکه مشارکت، مضاربت، یا استصناع او اړوند شرایط واضح شي، تر څو د هغې شرعي ارزونه په دقیقه توګه ممکنه شي.
د نوموړي په خبره، د پښتني بانک له خوا وړاندې شوې طرحه کې ځینې اسلامي معاملاتي اصول لکه مشارکت، مضاربت، او اجاره ذکر شوي، خو لا هم ځینو نورو مواردو ته اړتیا ده چې باید بشپړ شي.
دوی وایي، د نیمګړتیاو تر بشپړېدا وروسته به یې په تړاو فقهي استخراج او شرعي ارزونه وکړي.
