په اتو ښارونو کې څه باندې ۷۵۰ زره غیررسمي کورونه سروې او ثبت شول
د ښار جوړولو او ځمکو وزارت د غیررسمي ښاري سیمو ثبت بروګرام له لارې تر دې دمه په کابل، هرات، مزار شریف، جلال آباد، کندهار، فراه، بامیان او نیلي ښارونو کې ټولټال ۷۵۴ زره او ۲۳۳ غیررسمي کورونه سروې او ثبت کړي دي.
له دې شمېر غیررسمي کورونو څخه ۴۷۴۹۷۲ کورونه په کابل، ۸۱۴۴۲ کورونه په مزار شریف، ۷۲۷۴۳ کورونه په هرات، ۵۱۸۱۸ کورونه په کندهار، ۲۴۳۸۴ کورونه په جلال آباد، ۱۲۳۹۲ کورونه په بامیان، ۱۲۰۱۴ کورونه په فراه او ۷۱۳۸ کورونه هم د دایکندي ولایت په مرکز نیلي ښار کې پراته دي.
د ښار جوړولو او ځمکو همدا رنګه څه موده وړاندې د غیررسمي ښاري سیمو پوښښ ساحه پراخه کړه چې په پایله کې ۳۷۷۲ کورونه د کابل ولایت په میربچه کوټ، ۲۶۱۷ د بلخ ولایت په بلخ، ۴۶۷۰ د کندهار ولایت په سپین بولدک او ۶۷۲۱ کورونه هم د هرات ولایت په انجیل ولسوالۍ کې سروې او ثبت شول.
په غیررسمي سیمو کې د پرتو کورونو سروې او ثبت، د ملکیت سندونو ورکړه، د رسمي او غیررسمي سیمو ترمنځ د توپير له منځه وړل، د برابرو خدمتونو ورکړه او د بهسازۍ برنامې له لارې د دغو سیمو بیا رغونه او په غوره سیمو د هغو بدلول، د غیررسمي ښاري سیمو ثبت پروګرام اصلي موخې جوړوي.
د غیررسمي ښاري سیمو کورونو سروې او ثبت سره هم مهاله، د ملکیت سندونو وېش لړۍ هم پیل او تر دې دمه په کابل، هرات، جلال آباد، بامیان او نیلي ښارونو کې ۲۰ زره د ملکیت سندونه وېشل شوي دي.
د ښار جوړولو او ځمکو وزارت د ۲۰۲۰ کال تر پایه په یادو اتو ښارونو کې څه ۵۰۰ زره د ملکیت سندونه وېشي چې ورسره درې میلېونه هېوادوال له ګټو یې برخمن کیږي.
