پارون کې د ښاري تخلفاتو د مخنیوي په موخه څارنه پیل شوه
۱۴۴۷/۴/۲۰
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د نورستان ولايت د کور او ښار جوړولو رياست د محترم رئیس مولوي رحیم الله برهاني په لارښوونه او همکارۍ د دغه ریاست تخنیکي ټیم د مرکز پارون ښار له لومړۍ ناحیې څخه څارنه وکړه.
ښاغلی مولوي حقاني وایي، د څارنې پر مهال ثابته شوه چې د لومړۍ ناحیې اړوند سیمه کې يو کس غو ښتل چې په شنه ساحه کې تجارتي ودانۍ جوړه کړي.
نوموړی وایي، د ښاري تخلفاتو د مخنیوي ټیم د یاد اقدام مخنیوی وکړ او مربوطه کس ته وویل شول، چې ساحه په پلان کې شنه ده او دوهم دا چې یوې مهمې دولتي ادارې ته مخامخ وه.
دوی زیاتوي، اړوند کس ته لارښوونه وشوه چې خپلې چارې دې د نورستان ولایت لپاره د جوړ شوي پلان مطابق پر مخ یوسي، تر څو د ښاري نظم او چاپېريال ګډوډ نه شي.
نورستان ولایت کې د کور او ښار جوړولو ریاست ژمن دی چې هېچاته به د پلان خلاف د عمل کولو اجازه ورنه کړي او له ټولو غواړي چې ښاري پلانونو ته وفادار پاتې شي.
