ولایتونو کې ښاري ستونزو ته د ښار جوړولو قانون پر بنسټ، رسېدنه کېږي
![picture](/sites/default/files/2024-05/2_6.jpeg)
۱۴۴۵/۱۱/۲۰
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په خپل کاري دفتر کې د بغلان، ارزګان، کونړ، لوګر، سرپل او میدان وردګو ولایتونو د کور او ښار جوړولو وزارت له اړوندو رئیسانو سره وکتل.
د کور او ښار جوړولو وزارت یادو محترمو ولایتي رئیسانو غوښتنه وکړه، چې د ولایتونو لپاره یې د ماسټر پلان اړتیا زیاته ده، ترڅو ټولې ودانیزې چارې د پلان مطابق سرته ورسېږي.
یادو رئیسانو وویل، لازمه ده چې د کور او ښار جوړولو وزارت رهبري ولایتي سفرونه وکړي، تر څو په ولایتونو کې شته ښاري وضعیت له نږدې وارزوي او د حل لپاره یې لاس په کار شي.
په ناسته کې، د ښاري چارو محترم مرستیال شیخ مدارعلي کریمي بامیاني وویل، په ولایتونو کې به ښاري ستونزو ته د ښار جوړولو قانون په رڼا کې رسېدنه کېږي، چې مسوده یې ترتیب شوي او په خبره یې په یاد قانون کې ښاري چارې منظمې ترتیب شوي او له نورو ادارو سره د وظیفوي تداخل مخنیوی هم په کې شوی دی.
ښاغلي بامیاني، ولایتي رئیسانو ته سپارښتنه وکړه، چې د خلکو د خدمت لپاره هڅې ګړندۍ کړي، تر څو خلکو ته اسانتیاوې برابرې شي.
دغه راز، په یاده ناسته کې یادونه وشوه، چې په پام کې ده سږ کال د ټولو ښارونو سروې او په هر ولایت کې د څلور څلور ولسوالیو لپاره پلانونه جوړول شي.