میدان وردګ ولایت کې د کډوالو بلاکونو د پروژې له ودانیزو چارو څارنه ترسره شوه
۱۴۴۷/۹/۲۸
میدان وردګ ولایت کې د کور او ښار جوړولو د محترم ریاست اړوند تخنیکي او مسلکي ټیم له لوري، د کډوالو بلاکونو د ودانیزې پروژې له روانو چارو تخنیکي څارنه ترسره شوه.
دغه څارنه د کور او ښار جوړولو وزارت، له ښاري سرغړونو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
موخه دا وه، څو د کارونو د کیفیت، د ودانیزو معیارونو رعایت او د پروژې د پرمختګ وضعیت و ارزول شي.
د څارنې په مهال څرګنده شوه چې د یادو بلاکونو روانې چارې په منظم ډول دوام لري او اړوند تخنیکي ټیم د پایپونو د مناسب نصب، د نښلونکو نقطو د سم تنظیم او د اوبو د لېږد د سیستم د معیاري تطبیق په اړه کار کوونکو ته لازمې لارښوونې وکړې.
همدارنګه د پروژې په چوکاټ کې د سپټیک څاه د دېوالونو د پاتې برخې قالب تدل هم روان دي، چې د څارنې ټیم، د اندازو د دقیق رعایت او د راتلونکو کانکرېټي کارونو لپاره د مناسب چمتووالي په اړه قراردادي شرکت ته تخنیکي سپارښتنې وکړې.
د څارنې په ترڅ کې د پروژې عمومي پرمختګ هم و ارزول شو او قراردادي شرکت ته سپارښتنه وشوه چې ټولې چارې د تخنیکي مشخصاتو، د پروژې د نقشو او ټاکلي مهالوېش مطابق ترسره کړي.
میدان وردګ ولایت کې، د کور او ښار جوړولو محترم ریاست اړوند تخنیکي ټیم به په دوامداره توګه د پروژې له پرمختګ څخه څارنه کوي، تر څو ټولې چارې په معیاري ډول بشپړې او د کډوالو لپاره مناسب او خوندي استوګنیز چاپېریال برابر شي.
