میدان وردګ ولایت کې د ښاري تخلفاتو مخنیوی وشو
۱۴۴۶/۰۹/۱۶
د کور او ښار جوړولو وزارت له ښاري تخلفاتو د مخنیوي ریاست محترم رئیس مولوي عبدالمنان حقاني وایي، تخنیکي ټیم یې په میدان وردګ ولایت کې د دغه ولایت د کور او ښار جوړولو د محترم رئیس مولوي عبدالقیوم سیف العمر په لارښوونه او همکارۍ په یاد ولایت کې د ښاري تخلفاتو مخنیوی وکړ.
ښاغلی مولوي حقاني وایي، ټیم یې د مرکز ميدان ښار اړوند په سردار محمد داود خان ښارګوټي کې خپلې چارې پیل کړي دي.
نوموړی وایي، د نوموړي ښارګوټي د تفصيلي پلان خلاف د سيلبر د حريم په شنه ساحه کې د يوه شخص له لوري د يوې استوګنیزې نمرې جوړولو چارې روانې وې چې، دوی یې مخنیوی وکړ.
سرغړوونکي کس ته لازمې لارښوونې شوي چې، څنګه کېدای شي په مصؤن او د پلان مطابق ځای کې کور جوړ کړي او ارام ژوند غوره کړي.
د کور او ښار جوړولو وزارت هېچا ته اجازه نه ورکوي چې، د پلان خلاف چارې ترسره کړي.
