میدان وردګو ولایت کې د ترانسپورتي ترمینل د دوهمې برخې ودانیزې پروژې له چارو څارنه وشوه
۱۴۴۷/۹/۶
میدان وردګو ولایت کې د کور او ښار جوړولو محترم ریاست تخنیکي ټیم د خپل عمومي ریاست په همغږۍ او لارښوونې، د یاد ولایت د ترانسپورتي ترمینل د دوهمې برخې ودانیزې پروژې د کارونو څارنه او ارزونه وکړه.
دغه پروژه چې د کور او ښار جوړولو وزارت له لوري رشاد ناصري ودانیز شرکت ته په قرارداد ورکړل شوې، چې د شوې هوکړې له مخې پلي کېږي او دا مهال په ټاکلي پلان سره پر مخ روانه ده.
قراردادي شرکت هڅې پیل کړي، چې د واورو پاکولو په موخه ساحې ته ګریډر ماشین انتقال کړي، څو د سړکونو د مسیر د کوردیناتو د تطبیق لپاره واوره پاکه شي، اما دا چې ساحه کې زیاته واوره ورېدلې او نم لري، چارې یې له ځنډ سره مخامخ کړي دي.
میدان وردګو ولایت کې د کور او ښار جوړولو محترم ریاست، مسؤل شرکت ته سپارښتنه وکړه چې د واورو تر بشپړ ختمېدو پورې خپله ماشینري له ساحې څخه انتقال کړي او هممهاله د کرش پلانټ د نصب چارې ژر تر ژره بشپړې کړي.
تمه ده چې د اقلیمي شرایطو له ښه کېدو سره سم به اړوند شرکت عملي کارونه بېرته په منظم ډول پیل کړي.
د کور او ښار جوړولو ریاست ټینګار کوي چې د پروژې چارې به د تخنیکي معیارونو او ټاکل شوي مهالوېش سره سم تعقیب او نظارت شي.
