مهاجرینو ته د ځمکو د وېش لړۍ تر ننګرهار ورسېده او په لنډ وخت کې به یې لمن پراخه شي
۱۴۴۷/۰۷/۲۰
د کور او ښار جوړولو وزارت د محترم وزیر، الحاج مولوي نجیبالله حیات حقاني، په مشرۍ او د مل پلاوي په ګډون، په ننګرهار ولایت کې د مهاجرینو په ځانګړي ښارګوټي کې پر راستانه شوو مهاجرو کورنیو د نمرو د وېش بهیر پیل شو.
محترم وزیر الحاج مولوي نجیب الله حیات حقاني، د یادو مراسمو پر مهال، پر هېوادوالو، پانګوالو او شتمنو کسانو غږ وکړ چې د مهاجرو افغانانو د ملاتړ لپاره خپل اسلامي او ملي مسؤلیت ادا کړي او د استوګنې، بنسټیزو اسانتیاوو او زیربنایي خدماتو د برابرولو په برخه کې همکاري وکړي.
ښاغلي حیات حقاني ټینګار وکړ، چې د مهاجرینو منظم مېشت کېدل د ټولنیز ثبات، اقتصادي پراختیا او ښاري نظم لپاره ځانګړی ارزښت لري او دوی ورته ژمن دي.
دغه بهیر د شاوخوا پنځه زره راستانه شوو مهاجرو کورنیو د منظم مېشت کېدو او د دایمي استوګنې د حل لارې په موخه پیل شو.
د کور او ښار جوړولو وزارت ژمن دی، چې د مهاجرینو ښارګوټو د طرحې، نمره بندۍ، زیربنایي چارو او معیاري کور جوړولو پروژې د ملي تګلارو او مسلکي معیارونو له مخې تطبیق کړي.
د دې چارې له مخې به راستنې شوې مهاجرې کورنۍ وکولای شي په خوندي، باعزته او دوامدار چاپېریال کې خپل ژوند له سره پیل کړي.
