محترم محمود کرزی: د کابل نوي ښار په جوړېدو کې د خلکو ګټې موږ ته لومړیتوب لري
ښار جوړولو او ځمکو وزارت سرپرست وزیر محترم محمود کرزی د ده سبز ولسوالی له مشرانو او استازو سره وکتل او د کابل نوي ښار د جوړېدو پر څرنګوالي خبرې وکړې.
په سر کې، د ده سبز ولسوالی مشرانو او استازو د نوي کابل ښار د جوړولو په برخه کې د ښار جوړولو او ځمکو وزارت سرپرست وزیر له ځانګړې پاملرنې او رېښتینو هڅو ستاینه وکړه و ټینګار یې وکړ چې د دې نوي ښار په جوړېدو سره به د محمود کرزي نوم په زرین خط د هېواد په تاریخ کې ولیکل شي. دوی زیاته کړه چې د کابل نوي ښار جوړېدل به د خلکو په اقتصادي او ټولنیز ژوند کې پام بدلون رامنځته کړي او د یاد وزارت له مشرتابه څخه د دې پروژې د ژر پیل غوښتنه وکړه.
ورپسې، د ښار جوړولو او ځمکو وزارت سرپرست وزیر محترم محمود کرزی د کابل نوي ښار احداث یې د دې وزارت له مهمو او لویو انکشافي پروژو څخه وباله او ټینګار یې وکړ چې د دې پروژې د ښه تطبیق لپاره د خلکو ملاتړ او همغږۍ ته اړتیا ده.
ښار جوړولو او ځمکو وزارت سرپرست وزیر د چارو د ښه تنظیم او د همغږۍ د رامنځته کولو لپاره د ده سبز ولسوالی له استازو څخه وغوښتل چې د ده سبز د زمیندارانو شورا چې په هغه کې د یادې ولسوالی د ټولو قومونو استازي په کې شتون ولري په رسمي توګه رامنځته کړي.
محترم محمود کرزی د کابل نوی ښار جوړېدل یې د ده سبز ولسوالی اوسېدونکو ته د اقتصادي او کاري فرصتونو د برابرولو په برخه کې مهم وباله او زیاته یې کړه چې د دې پروژې په تطبیق سره به هیڅ څوک زیانمن نشي. ښار جوړولو او ځمکو وزارت سرپرست وزیر وویل چې خلکو سره په تفاهم به د استوګنیزو نمرو قیمت وټاکل شي او ژمنه یې وکړه چې د کابل نوی ښار به ټولو استوګنیزو امکاناتو ته په کتو په مډرن ډول جوړ شی.
د دې کتنې په لړ کې، محترم محمود کرزي وویل چې د کابل نوي ښار جوړېدو لپاره د مالکیت حق تثبیت او د ځمکو تصفیه اساسي شرط دی او د خلکو له استازو څخه یې وغوښتل چې په دې تړاو له یاد وزارت سره پوره همکاري وکړي. هغه زیاته کړه چې د عامه تاسیساتو لکه جوماتونو، ښونځیو، پوهنتونونو، کلینیکونو، روغتونونو او نورو عامه تاسیساتو د جوړېدو لپاره به ځمکه په وړیا توګه ځانګړی شي.
د غونډې په پای کې، محترم محمود کرزی، د ده سبز ولسوالی د خلکو له استازو سره هوکړه لیک لاسلیک کړ چې له دې سره به د نوي کابل ښار د جوړېدو چارې په سمه توګه تنظیم شي.
###
