لغمان ولایت کې د مهاجرینو د ښارګوټي اړوند نمرې ووېشل شوې
۱۴۴۷/۷/۷
په لغمان ولایت کې هغو اړمنو کورنیو ته چې له کلونو مهاجرت وروسته بېرته خپل ټاټوبي ته راستنې شوي او بې کوره دي، د هیلو دروازې پرانیستل شوې.
د اسکان دایمي کمېټې په مشرۍ د کور او ښار جوړولو وزارت د دغو کورنیو لپاره د نمرو د وېش عملي بهیر پیل کړ او په منظم ډول روان دی.
د کور او ښار جوړولو وزارت محترم وزیر الحاج مولوي نجیبالله حیات حقاني، هڅې ګړندۍ کړي او هیلې یې په عمل بدلې کړي چې د منظور شوو ښارګوټو نمرې باید په چټکۍ سره هغو مستحقو کورنیو ته ورکړل شي چې اسناد یې د اړوندو ولایتونو له لوري تایید شوي وي.
د لغمان ولایت د کور او ښار جوړولو ریاست وایي، د مهاجرو ښارګوټي کې د ځمکو د وېش لړۍ رسمي پیل شوې او هره ورځ د پر مخ تګ په حال کې ده.
په ورته وخت کې د لغمان ولایت د کور او ښار جوړولو رئیس د کلیو او پراختیا رئیس او د اوبو رسونې او فاضلابو آمریت مسؤلینو ته په ښارګوټي کې د اوبو رسونې شته ستونزو ته د رسېدنې په برخه کې لازمې لارښوونې وکړې، چې د اړوندو مسؤلینو له لوري د بشپړې همکارۍ ډاډ ورکړل شو.
د لغمان ولایت د کور او ښار جوړولو ریاست د کډوالو او راستنېدونکو لپاره د معیاري استوګنځایونو د برابرولو، منظم پلان جوړونې او بنسټیزو خدمتونو د رامنځته کولو په موخه د ولایتي ادارو سره په همغږۍ خپلې چارې پر مخ وړي.
دا بهیر په ټولو ولایتونو کې عملي کېږي او دوام لري، ترڅو د هغو کورنیو لپاره چې په کوردننه مېنه نه لري؛ د مناسب مسکن زمینه برابره شي.
