فراه ولایت کې د خپل سرو ودانیو له جوړېدو مخنیوی وشو
۱۴۴۶/۲/۱۶
د فراه ولایت د کور او ښار جوړولو ریاست محترم رئیس مولوي نصرالله استقلال وایي، د دې ریاست اړوند د ښاري تخلفاتو مخنیوي ټیم لخوا د ښار په درېیمه او څلورمه ناحیه کې د یو شمېر خپل سرو ودانیو له جوړېدو مخنیوی وشو.
ښاغلي مولوي استقلال وویل، د یاد ریاست د ښاری تخلفاتو مخنیوي ټیم د یادو ناحیو څخه لیدنه وکړه او هغه کورونه چی په خپل سر او بې نقشې جوړېدل کارونه یې وځنډول شول.
نوموړی وایي، د کورونو مالکانو ته لارښوونه وشوه، چې د ښاري تخلفاتو مخنیوي طرزالعمل له مخې، نقشې جوړې او ویزه کړي او له هغې وروسته دې د کورونو پر جوړولو پیل وکړي.
د کور او ښار جوړولو وزارت مرکزي او ولایتي ټیمونه د ښاري نظم په موخه د ودانیو له چارو څارنه کوي، تر څو چارې د پلان او نقشې مطابق تر سره شي.
