فاریاب کې د دوه روغتیايي پروژو رغنیزې چارې دوام لري
ښارجوړولو او ځمکو وزارت د فاریاب ولایت په اندخوی ولسوالۍ کې د معتادینو ۵۰ بستریز روغتون رغنیزې چارې ۴۰ سلنه او د دې ولایت په شرین تګاب ولسوالۍ کې د ۲۰ بستریز روغتون رغنیزې چارې ۲۵ سلنه بشپړې کړي دي.
د معتادینو ۵۰ بستریز روغتون په ۱۹۹۹ متر مربع ځمکه کې په درې پوړونو د ۸۶ میلیونه افغانیو او د شرین تګاب ولسوالۍ ۲۰ بستریز روغتون په ۲۵۰۰ متر مربع ځمکه کې په یو پوړ د ۶۸ میلیونه افغانیو په ارزښت د عامې روغتیا وزارت له پراختیايي بودیجې جوړیږي.
ښارجوړولو او ځمکو وزارت د هېواد په کچه د روغتیايي مرکزونو، د دولتي ادارو ودانیو، ورزشي سټډیمونو، کتابتونونو، موزیمونو، وړکتونونو، جوماتونو او تعلیمي او تحصیلي مرکزونو په جوړولو کې رغنده رول لوبولی او د ټولګټو پروژو تطبیق د دې وزارت په کاري لومړیتوبونو کې ځای لري.
###
