غزني کې د مهاجرینو لپاره دوهم ښارګوټی سروې شو
۱۴۴۶/۰۶/۲۰
غزني ولایت کې د کور او ښار جوړولو ریاست محترم رئیس مولوي نور ولي بلال متقي وایي، د کور او ښار جوړولو وزارت د محترم مقام د هدایت سره او د سروې او جي ای ایس ریاست په همکارۍ یې دغه ولایت کې د مهاجرینو لپاره دوهم ښارګوټی هم سروې کړ.
ښاغلی مولوي بلال متقي وایي، یاد ښارګوټی د غزني په شیخ عبدالسلام سیمه کې موقعیت لري، چې دوی یې د توپوګرافي سروې له چارو لیدنه او څارنه وکړه.
نوموړی وایي، له دغې سروې یې موخه دا ده، چې د یاد ښارګوټي لپاره منظم تفصیلي پلان ترتیب او پلي شي.
دوی وایي، غزني کې د مهاجرینو لپاره د دوهم ښارګوټي سروې او تفصیلي پلان ترتیبولو چاره به په دغه ولایت کې د منظمې ښاري پراختیا لپاره اغېزمن ګام وي او دغه راز به د مکسن کمښت ستونزه تر یو بریده راکمه کړي.
د کور او ښار جوړولو وزارت هڅې پیل کړي چې د بې سرپناه کورنیو لپاره په کور دننه د مناسبې سرپناه زمینه برابره کړي.
