راستنو شویو کډوالو ته د استوګنې نوې هیله؛ څه باندې ۲۰۰۰ کورنیو ته د ځمکو نمرې ووېشل شوې
۱۴۴۷/۱۲/۷
د هېواد په بېلابېلو ولایتونو کې د راستنو شویو مهاجرو کورنیو لپاره د دایمي مېشتېدنې بهیر په دوام، د پنجشنبې او شنبې ورځو په جریان کې زرګونو کورنیو ته د هستوګنیزو ځمکو نمرې ووېشل شوې.
د کور او ښار جوړولو وزارت محترم وزیر الحاج مولوي نجیب الله حیات حقاني ټینګار کوي چې د راستنېدونکو مهاجرو د دایمي مېشتېدنې او هوسا ژوند لپاره به د ځمکو د وېش دا لړۍ لا هم په چټکۍ سره دوام ولري.
په ننګرهار ولایت کې ۵۰۲، کندهار کې ۲۹۴، کندز کې ۳۱۶، هلمند کې ۴۵۳، فراه کې ۱۴۶، فاریاب کې ۱۳۵، غزني کې ۱۰۱، پکتیکا کې ۴۶ او نیمروز کې ۱۸ راستنو شویو مهاجرو کورنیو ته د استوګنې ځمکې ورکړل شوې دي.
د پنجشنبې او شنبې ورځو په ترڅ کې ټولې ۲۰۱۱ استوګنیزې نمرې راستنو شویو کورنیو ته ووېشل شوې.
همداراز، د وېش د روان بهیر له پیل راهیسې تر دې مهاله په ټول هېواد کې ۳۴ زره او ۱۴۱ کورنیو ته د استوګنې ځمکې وېشل شوې دي.
دغه اقدام په داسې حال کې ترسره کېږي، چې زرګونه راستنې شوې کورنۍ د سرپناه او د ژوند د لومړنیو اسانتیاوو له جدي اړتیا سره مخ دي.
د ځمکو د نمراتو وېش نه یوازې د کډوالو لپاره د نوې هیلې پیغام ګڼل کېږي، بلکې د باثباته او هوسا راتلونکي پر لور یو مهم ګام هم بلل کېږي.
