د کوه قُرغ ساحه د ښاري پراختیا لپاره مناسبه وپېژندل شوه
۱۴۴۷/۰۷/۰۸
د امیرالمؤمنین حفظه الله د حکم له مخې، د کابل ښار د ۴۱ ساحو له ډلې څخه د شپږمې ناحیې اړوند د کوه قُرغ ساحې لپاره پراخ او هر اړخیز ښاري مطالعات په بریالیتوب سره بشپړ شول.
دغه مطالعات چې د ۶۳۷.۵ جریبه ځمکې مساحت رانغاړي، د ښاري پراختیا، چاپېریال ساتنې، زیربناوو، د ځمکې د تخنیکي معیارونو او ټولنیزو، اقتصادي شرایطو په رڼا کې د مسلکي تخنیکي ټیمونو له لوري ترسره شوي دي، د سیمې فزیکي سروې، دقیق تخنیکي تحلیلونه او میداني مشاهدات د یادو مطالعاتو اساسي بنسټ جوړوي.
د کور او ښار جوړولو وزارت د ښاري مطالعاتو ریاست په لارښوونه، یو پیاوړی تخنیکي ټیم ساحې ته واستول شو، تر څو د سېلابونو د کنټرول، د اوبو د سرچینو د مدیریت، چاپېریالي اغېزو او د معیاري ښاري پلان د امکان سنجونې په برخه کې هر اړخیزې څېړنې ترسره کړي.
د ترسره شوو مطالعاتو پایلې ښيي چې د کوه قُرغ ساحه د ښاري پلان له مخې د زرګونو کورنیو د استوګنې وړتیا لري او کولای شي په راتلونکې کې د کابل ښار د متوازن، منظم او دوامدار پرمختګ لپاره یو مهم بنسټ وګرځي.
دا هڅې د اسلامي امارت د مشرتابه د لیدلوري له مخې د قانونمند ښاري پراختیا، د غصب مخنیوي او د هېوادوالو لپاره د خوندي او معیاري استوګنیزو سیمو د برابرولو په موخه ترسره کېږي.
