د کونړ زلزلهځپلو لپاره د هغه ښارګوټي چې ټاکل شوې په زر (۱۰۰۰) جریبه ځمکه کې جوړ شي؛ د سروې او خط اچولو چارې یې بشپړې شوې
۱۴۴۷/۱۲/۷
د کونړ ولایت د زلزلهځپلو کورنیو لپاره د ځانګړي استوګنیز ښارګوټي د تطبیق، سروې او خطاچولو چارې په بشپړ ډول پای ته ورسېدې.
دغه ښارګوټی د ننګرهار ولایت د ګمبیري په سیمه کې په (۱۰۰۰) زر جریبه ځمکه کې طرحه او تطبیق شوی، چې کور او ښار جوړولو وزارت د سروې او جي ای ایس ریاست له لوري یې تخنیکي، انجینري او جغرافیایي چارې بشپړې شوې.
په دې پروژه کې د ځمکو دقیقه سروې، د بلاکونو او نمراتو تنظیم، د داخلي سړکونو ابتدایي ډیزاین، د استوګنیزو ساحو تفکیک، او د عامه تأسیساتو لپاره د ځانګړو ساحو تثبیت شامل دي.
همداراز د جي ای ایس عصري سیستم له لارې د ښارګوټي ټول تخنیکي معلومات ثبت او نقشهبندي شوي دي، څو د راتلونکو پراختیایي چارو لپاره معیاري بنسټ برابر شي.
یاد ښارګوټی د کونړ ولایت د هغو کورنیو د دایمي اسکان لپاره جوړ شوی چې د وروستیو زلزلو له امله یې کورونه او شتمنۍ زیانمنې شوې وې.
د پروژې له بشپړېدو وروسته اوس سیمه د عملي استفادې او د کورنیو د انتقال لپاره بشپړه چمتو شوې ده.
دغه ډول پروژې نه یوازې د طبیعي پېښو زیانمنو ته د سرپناه زمینه برابروي، بلکې د منظمې ښاري پراختیا، معیاري استوګنځایونو او دوامدارو خدماتو د رامنځته کېدو لپاره هم مهم رول لوبوي.
