د کندز ښار د ودانیزو فعالیتونو د څارنې لپاره ساحوي تخنیکي نظارت ترسره شو
۱۴۴۷/۰۸/۲۱
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، په کندز ولایت کې د ودانیزو پروژو د تطبیق د څارنې لپاره تخنیکي ټیم د ساحوي څارنې ماموریت ترسره کړ.
د څارنې پر مهال څرګنده شوه چې په ځینو ودانیو کې د رسمي تعدیل اسناد نه وو، او د ښار جوړولو ریاست سره د همغږۍ پرته ودانیزې چارې پر مخ وړل کېدې، د تخنیکي ټیم له لوري دغه ودانیز فعالیتونه د ښاري پلان، د سړک حریم او پلان شوي فاصلو د رعایت په موخه ودرول شول.
سربېره پر دې، په ځینو نورو ودانیو کې د پلان شوي سړک حریم او جوړښتي معیارونو مراعت نه و شوی، چې د ټیم لخوا د ودانیزو فعالیتونو بندیز ولګول شو، د نظارت هدف دا دی چې د ښار جوړونې قوانین، د ښاري نظم اصول او د ودانیزو معیارونو بشپړ رعایت یقیني شي.
تخنیکي ټیم څرګندوي چې د ودانیزو چارو څارنه دوام لري او ټول رسمي راپورونه او اسناد د وزارت اړونده څانګو ته د رسېدو په حال کې دي، دا اقدام د ښاري پراختیا د منظم مدیریت او د ښاري سرغړونو د مخنیوي لپاره ترسره کېږي.
