د کابل ښار په یوولسمه ناحیه کې د ښاري تأسیساتو او ښاري نظم له وضعیت څخه ساحوي څارنه ترسره شوه
۱۴۴۸/۱/۱۸
د کور او ښار جوړولو وزارت د کیفیت کنټرول او د ښاري سرغړونو د مخنیوي د عمومي ریاست اړوند، د ښاري سرغړونو د مخنیوي ریاست تخنیکي ټیم د کابل ښار د یوولسمې ناحیې اړوند ساحه کې د ښاري تأسیساتو، اوسپنیزو غرفو او ښاري نظم له وضعیت څخه ساحوي څارنه ترسره کړه.
د څارنې پر مهال د سرک د منځني ګلدان په ساحه کې د نصب شویو فلزي غرفو وضعیت له نږدې و ارزول شو.
د تخنیکي ټیم د موندنو له مخې، د دغه غرفو د جوړولو څخه موخه د ښاري نظم پیاوړتیا او د لاس پلورونکو د فعالیتونو تنظیم دی، خو په اوسني موقعیت کې یې د ګڼې ګوڼې د رامنځته کېدو، د خلکو د تګ راتګ د بهیر د اغېزمنېدو او د ښاري نظم د ګډوډۍ لامل هم ګرځېدلی دی.
د ارزونې پر مهال څرګنده شوه چې د پلورونکو او مراجعینو د راټولېدو له امله په یاده ساحه کې ګڼه ګوڼه زیاته شوې، چې د ښاري نظم او د ښاري چاپېریال پر کیفیت یې منفي اغېز کړی دی.
د تخنیکي ټیم د ارزونې له مخې، د ورته ښاري تأسیساتو د ځای ټاکنه او تطبیق باید د کور او ښار جوړولو له اصولو، تخنیکي معیارونو او تصویب شویو پلانونو سره سم ترسره شي، ترڅو د ښاري نظم د ټینګښت ترڅنګ د خلکو د خوندي او اسانه تګ راتګ زمینه هم برابره شي.
د کیفیت کنټرول او د ښاري سرغړونو د مخنیوي عمومي ریاست ټینګار کوي چې د ښاري پروژو او عامه تأسیساتو د پلي کېدو پر مهال باید تخنیکي معیارونه او د ښار جوړولو اصول په جدي توګه رعایت شي، ترڅو د ښاري نظم، د ښاري چاپېریال د کیفیت او د ښار د منظم او معیاري پرمختګ بهیر لا پیاوړی شي.
