د کابل ښار په جنگلک سیمه کې د استوګنیزو کورونو له ودانیزو چارو څارنه وشوه
۱۴۴۷/۰۷/۲۲
د ودانیزو او بنسټیزو پروژو د تطبیق د څارنې ریاست تخنیکي ټیم د دوامدارې څارنې په لړ کې، د کابل ښار د جنگلک په سیمه کې د استوګنیزو حویلیو د جوړولو له پروژې څخه لیدنه وکړه.
د ترسره شوې څارنې پر مهال څرګنده شوه چې د پروژې ساحوي چارې د تخنیکي اسنادو او ټاکل شویو مشخصاتو سره سم روانې دي او پکې د استوګنیزو واحدونو خشت کاري، د سلبونو قالب کاري او د کانکریټ د اته ویشت ورځني ازموینې پایلو ارزونه شاملې وې.
یاده پروژه د سترې محکمې د اداري معاونیت تر مدیریت لاندې ده چې د دې ادارې د مرکزي منسوبینو لپاره تطبیقېږي او دا مهال شاوخوا اته دېرش سلنه فزیکي پرمختګ لري. د څارنې په ترڅ کې ساحوي انجنیرانو ته لازمې لارښوونې ورکړل شوې تر څو د قرارداد د تخنیکي اسنادو، ملي او نړیوالو معیارونو او د کار د خوندیتوب اصولو ته جدي پاملرنه وشي او چارې په منظم ډول پر مخ ولاړې شي.
