د کابل ښار پنځمې ناحیې اړوند د پلي لارو او سړکونو د پاک ساتلو په موخه عامه پوهاوی ترسره شو
۱۴۴۷/۸/۲۸
د ښار پاک ساتل او ښاري قوانین مراعتول د هر افغان دنده ده، چې باید ترسره یې کړي او یوازې مسؤلو ادارو ته لاس ترزنې پاتې نه شي.
له ښاري تخلفاتو د مخنیوي ریاست، اړوندو د عامه پوهاوي او نظارت له امریتونو څخه جوړ شوي ټیمونو، د کابل ښار پنځمې ناحیې د کمپنۍ سړک په ساحه کې له ښاري فعالیتونو څخه لیدنه وکړه.
د دې لیدنې موخه هغه لاس پلورونکو، کراچۍ لرونکو او نورو کسب کارانو ته عامه پوهاوی ورکول وو، چې د کمپنۍ سړک په مسیر کې یې د سړکونو او پلي لارو له حریم څخه استفاده کوله او د تګ راتګ خنډ یې رامنځته کړی و.
د یادې لیدنې پر مهال اړوندو اشخاصو ته وویل شو، چې د یادې نېټې له ثبتېدو وروسته به د ۳۰ ورځو په موده کې پلي لارې او د سړک حریمونه تخلیه کړي او یا هم د خپلو پلور ځایونو د انتقال او بدیل ځای موندلو لپاره لازم اقدامات ترسره کړي.
ټینګار وشو چې د ټاکل شوې مودې له پای ته رسېدو وروسته به د سرغړوونکو هېڅ ډول شکایت د منلو وړ نه وي.
د یاد اقدام موخه د پلي لارو او سړکونو پاک کول، د ګڼې ګوڼې مخنیوی، د سیمې هویت او هوساینه، د ښاریانو د ستونزو حل او په ښار کې د ښار جوړولو د قوانینو او مقرراتو د سم تطبیق ډاډمن کول دي.
یادې نظارتي او پوهاوي چارې د ښاري تخلفاتو د مخنیوي ریاست د رئیس په هدایت ترسره شوې، تر څو ډاډ ترلاسه شي چې ښاري قوانین په سمه توګه پلي کېږي او د ښاري او ساختماني تخلفاتو مخه ونیول شي.
