د کابل ښار د نیله باغ استوګنیزې پروژې چارې ۵۵ سلنه بشپړې شوې دي
۱۴۴۷/۰۵/۱۹
د کور او ښار جوړولو وزارت اړوند د نیله باغ استوګنیزه پروژه د یاد وزارت له مهمو او سترو و پروژو څخه ده، چې د چین هېواد د بېعوَضه مرستو په مټ رغول کېږي.
د یادې پروژې مسؤلین وایي چې د کار روان بهیر تر اوسه ۵۵ سلنه بشپړ شوی او د ودانیو د اسکلیټ یا جوړښت مرحله بشپړه شوې ده، همدارنګه د نورو برخو کارونه په چټکۍ سره روان دي.
محترم عبدالوهاب صدیقي، د نیله باغ استوګنیزې پروژې رئیس او مسؤل، وایي چې د یادې پروژې طرحه او ډیزاین د نړیوالو معیاراتو پر بنسټ جوړ شوې او د ودانیزو چارو کیفیت په لوړه کچه ساتل شوی دی. هغه زیاته کړه چې د دې پروژې لپاره د معیاري ژوند ټول اړین سهولتونه په پوره ډول په پام کې نیول شوي دي.
صدیقي صاحب دغه پروژه د کور او ښار جوړولو وزارت لپاره ځانګړې او مهمه پروژه وبلله او وویل، د وزارت مشرتابه، په ځانګړې توګه د کور او ښار جوړولو محترم وزیر الحاج مولوي نجیبالله حیات حقاني، د دې پروژې چارو ته جدي پاملرنه کوي، او کله چې د کار پر مهال کومه ستونزه رامنځته شي، سمدستي د حل لپاره اقدام کوي.
په همدې حال کې، کارګرانو وویل چې نږدې ۶۰۰ تنه کارکوونکي د دې پروژې په بېلابېلو برخو کې بوخت دي.
د یادونې وړ ده چې د نیله باغ پروژه د کور او ښار جوړولو وزارت له مهمو استوګنیزو او څو پوړیزو ساختماني پروژو څخه ده، چې ټول ټال ۵۶ بلاکونه او ۱۴۰۰ اپارتمانونه لري.
دا پروژه شاوخوا یو نیم کال وړاندې د اسلامي امارت د لوړپوړو چارواکو، د کور او ښار جوړولو وزارت د مسؤلینو، د چین هېواد د سفیر او د چینایي شرکت د استازو لخوا په رسمي ډول پیل شوه.
د اړوندې برخې مسؤلین او انجنیران ډاډ ورکوي چې د پروژې کار په چټکۍ روان دی او ټاکل شوې ده چې د ټاکلي وخت تر پای د بشپړېدو او د ګټې اخیستنې لپاره چمتو شي.
