د کابل ژوبڼ د انتقال په اړه بحث او مشوره وشوه
۱۴۴۶/۱۲/۶
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ، او د کرنې، اوبو لګولو او مالدارۍ، مالیې، عدلیې، کورنیو چارو وزارتونو، ملي چاپېریال ساتنې ادارې او د کابل ښاروالۍ استازو په ګډون، د کابل ښار له اوسني موقعیت څخه د ژوبڼ د انتقال لپاره ځانګړې غونډه وکړه.
په دې غونډه کې، د عالیقدر امیرالمؤمنین (حفظهالله) د حکم د تطبیق په موخه د کابل ښار څخه بهر د ژوبڼ لپاره د مناسب ځای د ټاکلو په اړه بحث او نظرونه تبادله شول.
محترم شیخ حمدالله نعماني وویل، د کابل اوسنی ژوبڼ د ترافیکي ګڼې ګوڼې لامل شوی چې دا وضعیت هم د خلکو او هم د لیدونکو لپاره ستونزې رامنځته کړي دي.
ښاغلي سرپرست وزیر وویل، په کابل ښار کې د ترافیکي ګڼې ګوڼې د کمښت لپاره اړینه ده چې ژوبڼ یوې بلې پراخې او مناسبې سیمې ته انتقال شي.
نوموړی وایي، دا چاره به په ښار کې د ګڼې ګوڼې د کمښت لامل او له بل پلوه خلک او سیلانیان د ژوو لېدو ته زړه ښه او لېواله شي او دغه راز به ورسره د امارت عواید هم زیات شي.
په ناسته کې تصمیم ونیول شو، چې د عالیقدر امیرالمؤمنین (حفظهالله) حکم باید عملي شي او د دې لپاره دې د اراضۍ ریاست په مشرۍ هیئت له نېکمرغه لوی اختر وروسته اونۍ کې د اراضۍ، ښاروالۍ، چاپېریال ساتنې، کادستر او کور اوښار جوړولو وزارت استازي، د املاکو د ثبت کتابونو پر بنسټ یو مناسب ځای وټاکي او وړاندیز دې یې وکړي.
دغه راز تصمیم ونیول شو، چې د اوسني ژوبڼ ساحه دې د پراختیایي ساحې په توګه بېرته د عاليقدر امیرالمؤمنین (حفظهالله) مقام ته وړاندیز شي.
