د کابل سروبي ولسوالۍ کې د رئیس باغ اقتصادي - تفریحي پارک د ځمکې د ملکیت د انتقال بهیر تر ارزونې لاندې ونیول شو
۱۴۴۷/۱۰/۲۵
د کور او ښار جوړولو وزارت، د اقتصادي زونونو د پراختیا ریاست محترم رئیس حاجي محمد مسعود وایي، د کابل د سروبي ولسوالۍ اړوند د باغ رئیس اقتصادي ـ تفریحي پارک د (۵۹.۶) جریبه ځمکې د ملکیت د انتقال په اړه مهمې تخنیکي او حقوقي ارزونې د ترسره کېدو په حال کې دي.
یاده ځمکه چې د کور او ښار جوړولو وزارت پورې اړوند ملکیت بلل کېږي، دا مهال د برېښنا شرکت له لوري ترې ګټه پورته کېږي.
د همدې موضوع د هر اړخیزې څېړنې په موخه، د کور او ښار جوړولو وزارت د محترم مقام له لوري، یو ګډ تخنیکي پلاوی وټاکل شو، چې پلاوي د سروبي ولسوالۍ ته سفر وکړ او د برېښنا شرکت د مالي او اداري مسؤلینو سره یې د یاد ملکیت د لېږد اړوند تخنیکي او حقوقي موضوعات وڅېړل.
د برېښنا شرکت مسؤلینو څرګنده کړې چې د موجوده اسنادو پر بنسټ، یاد ملکیت د کور او ښار جوړولو وزارت پورې تړاو لري او په خبره یې که دغه ملکیت د پنځه کلن ستراتېژیک پلان په چوکاټ کې شامل نه وي، نو د انتقال په برخه کې کومه ستونزه نه ویني.
سربېره پر دې، د اراضۍ (د ځمکو) ادارې له لوري هم د یاد ملکیت اړوند موضوع په رسمي ډول برېښنا شرکت ته استول شوې ده.
د ناستې په پای کې پرېکړه وشوه چې موضوع به د نافذه قوانینو او اصولو په رڼا کې تعقیبېږي او لازمې کړنې به تر سره شي.
