د کابل اولسمه ناحیه کې د ښاري سرغړونو مخنیوي په موخه عامه پوهاوی وشو
13/6/1446
د کور او ښار جوړولو وزارت د ښاري تخلفاتو مخنیوي راست محترم رئیس مولوي عبدالمنان حقاني وایي، اړوند ټیم یې د کابل ښار په اولسمه ناحیه کې د ادروګل ښارګوټي له ساحې لیدنه وکړه او هلته یې خلکو ته د ښاري سرغړونو مخنیوي برخه کې عامه پوهاوی ورکړ.
ښاغلی مولوي حقاني وایي، د یاد ښارګوټي اوسېدونکو ته د ښاری پلانونو د رعایت او تطبیق لپاره معلومات او ځانګړې لارښوونې وشوې، ترڅو ښار جوړولو اصول او مقرراتو ته په پام خپلې چارې تنظیم کړي.
نوموړی وایي، اړوند ټیم یې عام خلک وهڅول چې ښاري پلانونه رعایت کړي او د کور او ښار جوړولو له وزارت سره همکار پاتې شي.
د خلکو او د کور او ښار جوړولو وزارت ترمنځ د نږدې اړیکو رامنځته کول، موجوده ستونزو ته رسېدنه او د خلکو شکایتونه، نیوکې او وړاندیزونه اوریدل، ترڅو د خنډونو په له منځه وړلو او ښاري ستونزو حل کې مرسته وشي، د ښاري پلانونو رعایت او د ښاري فرهنګ او ژوند کولو پراختیا، د ښاري ژوند د رفاه لپاره د مسئولانو او ښاریانو ترمنځ د پیاوړې همکارۍ روحیه تازه کول او داسې نور موارد هغه ټکي وو، چې خبرې پرې شوې دي.
د کور او ښار جوړولو وزارت د ښاري سرغړونو د مخنیوي ترڅنګ خلکو په دې اړه عامه پوهاوی هم ورکوي، چې څنګه کېدای شي خوندي او ارام چاپېریال ولري، منظمه ښاري وده او پراختیا رامنځته کړي او له خپل سریو ډډه وکړي.
