د کابل–بګرام سړک د برېښنا لېږد د شبکې د مسیر د بدلون له چارو څارنه ترسره شوه
۱۴۴۷/۱۲/۲۴
د کور او ښار جوړولو وزارت د نوي کابل ښار عمومي ریاست اړوند تخنیکي ټیمونو د کابل ښار د ده سبز ولسوالۍ په سیمه کې د کابل–بګرام سړک د جوړیدو سره هم مهاله د برېښنا لېږد د شبکې د مسیر د بدلون له روانو چارو څخه څارنه ترسره کړه.
یاده پروژه د نوي کابل ښار د عمومي ریاست له مهمو بنسټیزو پروژو څخه ده چې د سړک جوړونې له پراختیايي پلانونو سره په همغږۍ کې د خدماتي شبکو د تنظیم او د برېښنايي زیربناوو د خوندیتوب په موخه عملي کېږي.
د تخنیکي ټیمونو له لوري د پروژې بېلابېلې برخې له نږدې وڅارل شوې او د چارو د چټکتیا او کیفیت د لوړوالي په موخه اړوند مسؤلینو ته لازمې تخنیکي سپارښتنې ورکړل شوې.
د نوي کابل ښار عمومي ریاست تخنیکي ټیمونه د دې پروژې ټولې چارې په دقیق ډول تعقیب او څاري، څو د منظور شوي پلان، تخنیکي معیارونو او انجینري اصولو له مخې یې تطبیق ډاډمن شي.
د برېښنا لېږد د شبکې د مسیر د بدلون له بشپړېدو سره به د کابل–بګرام سړک د پراختیايي چارو د دوام ترڅنګ د برېښنا د لېږد خوندي او معیاري سیستم رامنځته شي، چې د سیمې د ښاري پرمختګ په برخه کې مهم رول لري.
