د ښار جوړولو او ځمکو وزارت پراختیایي پروژو د وضعیت ارزونه وشوه
۱۴۴۳/۰۹/۰۶
د ښار جوړولو او ځمکو وزارت سرپرست محترم مولوي حمد الله نعماني په مشرۍ رهبري هیئت د مرستیالانو، رییسانو او د پروژو مسؤلینو په ګډون د یاد وزارت اړوندو پراختیایي پروژو د ارزونې، ننګونو او ستونزو ته د حل لارو پیدا کولو په تړاو ناسته وشوه.
په دغه ناسته کې د رییسانو او د پروژو مسؤلینو او امرینو د وزارت اړوندو پروژو په اړه بشپړ معلومات وړاندې کړل او پر هغه لارو چارو خبرې وشوې چې له مخې یې د ښار جوړولو او ځمکو وزارت وکولی شي حل لاره پیدا کړي.
دغه راز په یاده ناسته کې د ښارګوټو او هغه پروژو په اړه چې په تېر حکومت کې نیمه کاره پاتې دي او چارې یې په ټپه ولاړې دي، بحث وشو.
سربېره پر دې د وزارت اړوندو ریاستونو د دفترونو د منسجم کولو په یو مناسب ځای کې د راټولو په اړه هم نظریات وړاندې شول چې له مخې به یې د وزارت اړونده چارې لا اغېزمنې او چټکې شي.
د دغې ناستې بله موخه دا وه چې هغه شرکتونه چې د ښا رجوړولو او ځمکو وزارت اړوند پراختیایي پروژې یې د تېر حکومت په مهال پلې کړي او له درکه یې وزارت پوروړی شوی دی، خبرې وشوې چې له کومو اغېزمنو لارو چارو کار واخیستل شي چې نه شرکتونه زیانمن شي او نه هم اړونده پروژې.
د ښار جوړولو او ځمکو وزارت محترم وزیر مولوي حمد الله نعماني یادونه وکړه چې د وزارت برنامې او پروژې شته امکاناتو او بودیجې ته په کتو اولیت بندي او بشپړې شي.
نوموړي د هرې برخې مسؤلینو ته سپارښتنه وکړه چې یوه یوه کمېټه دې جوړه کړي، د اړوندې پروژې ارزونه دې وکړي، ننګونې او ستونزې دې په ګوته او د حل لارو په پیدا کولو دې مشخصه طرحه له منطقي دلایلو سره وړاندې کړي چې په اړه یې وروستی تصمیم ونیول شي.
