د ښار جوړولو او ځمکو وزارت سرپرست ښاغلي مولوي حمد الله نعماني د قالین اوبدونکو رهایشي او صنعتي ښارګوټو پروژو فعالیتونه وڅېړل
۱۴۰۰/۱۲/۲۵
د ښار جوړولو او ځمکو وزارت سرپرست ښاغلي مولوي حمد الله نعماني د قالین اوبدونکو رهایشي او صنعتي ښارګوټي پروژې له مسؤلینو سره وکتل او د یادو ښارګوټو فعالیت یې وڅېړه.
لومړی د قالین اوبدونکو رهایشي او صنعتي ښارګوټو پروژو مسؤلینو د یاد ښارګوټو د ایجاد موخې بیان کړې چې په جوړېدو سره به یې د قالینو صنعت او سوداګري وده ومومي، خلکو ته به د کار کولو زمینه برابره شي، د فقر او بې وزلۍ کچه به کمه شي، د صنعتي فعالیتونو لپاره به مناسبه زمینه برابره شي، داخلي صنعت به وده وکړي او دغه راز به خصوصي سکتور ته لازمې اسانتیاوې برابرې شي او له دولتي بکر ځمکو د سالمې اغیزې او ګټې اخیستنې لپاره به زمینه برابره شي.
د یادو ښار ګوټو مسؤلینو په دې برخه کې د لاسته راوړنو، کاري پرمختګونو او د کابل شکردرې ولسوالۍ ، ننګرهار ولایت بهسودو ولسوالۍ ، د بلخ ولایت په حیرتان دوراهي او د کندز ولایت په عشقلان دښته کې د قالین اوبدونکو ښارګوټو د شته ستونزو په اړه وزیر صاحب ته معلومات ورکړل.
د ښار جوړولو او ځمکو وزارت محترم سرپرست مولوي حمد الله نعماني د ورته ښارګوټو جوړول د هېواد په باثباته اقتصادي او ټولنیزې ودې او د سالم چاپیریال په رامنځته کولو کې مهم او اغېزناک وبلل او د یادو پروژو مسؤلینو ته یې د ښارګوتو په لا چټک فعالیت او پرمختګونو برخه کې لازمې لارښوونې وکړې.
