د ښار جوړولو او ځمکو وزارت سرپرست وزیر له کونړ والي سره وکتل
د ښار جوړولو او ځمکو وزارت سرپرست محترم محمود کرزي د کونړ والي محترم عبدالستار میرزکوال سره لېدنه وکړه.
په دې ناسته کې د یاد وزارت د ښار جوړولو چارو معین محترم روښان ولسمل، مالي او اداري معینې محترمې خاطرې سادات، د کونړ د ښارجوړولو او ځمکو رئیس محترم عبدالعزیز مومند، د کونړ ښاروال محترم عبیدالله ساپي او یو شمېر نورو مسوولانو هم ګډون درلود.
د ناستې په پیل کې د کونړ والي محترم عبدالستار میرزکوال د خاص کونړ ښارګوټي د جوړېدو تر څنګ، د ولایتي اداري کمپلکس، قېمتي ډبرو د سوداګریز مرکز، د ولایت مقام مېلمستون، د ولسوالیو پرمختیایي پلانونو، د کونړ سیمهییز پلان او همدا راز د کونړ په اووه ولسوالیو کې د ښاروالیو لپاره د ودانیو جوړول او د اسعداباد ښار پرمختیایي پلان تطبیق په برخه کې د وزارت د بېړنیو اقداماتو او همکاریو غوښتنه وکړه.
ورپسې د ښار جوړولو او ځمکو وزارت سرپرست وزیر محترم محمود کرزي د خپلو څرګندولو پر مهال ډاډ څرګند کړ چې د ولایت مقام د مېلمستون د پروژې د ډیزاین پاتې چارې به ژر نهایي او تدارکاتو ته واستول شي او تر څنګ به یې د اسعداباد ښار د نوي ماسټر پلان د جوړیدو لپاره تخنیکي پلاوی هم دې ولایت ته واستول شي.
همدا راز محترم محمود کرزي ژمنه وکړه چې د خاص کونړ ولسوالۍ د نوي ښار د تخنیکي سروې او ځمکو تصفیې لپاره به هم پلاوی وګماري.
د ناستې په ترڅ کې د ځمکو تصفیې په اړه د بحث تر څنګ د نورګل، نرنګ او سرکاڼو ولسوالیو د ښاري پلانونو نهایي کېدو او نورو مهمو پروژو د پلي کېدو په اړه د ښار جوړولو او ځمکو وزارت سرپرست وزیر له لوري اړوندو مسوولانو ته لازمې لارښوونې وشوې.
د کونړ ولایت د ښار جوړولو او ځمکو ریاست رئیس د خپلو خبرو پر مهال د خاص کونړ نوی ښارګوټی د دې ولایت د پرمختګ لپاره چې هوايي ډګر، د سید جمال الدین افغان پوهنتون اداري کمپلکس، صنعتي پارک، د استوګنیزو او تجارتي سیمو تر څنګ به په کې د لوبو او تفریح مرکزونه، سړکونه او نور عصري تاسیسات شامل وي، خورا مهم یاد کړ او د یادو تاسیساتو د جوړېدو په برخه کې یې په ګډو همکاریو ټینګار وکړ.
